دہلی NCR میں آلودگی ’سنگین‘ سے کم ہو کر ’بہت خراب‘ ہونے پر GRAP کا اسٹیج 3 ختم کر دیا گیا۔ دفاتر اور اسکول معمول پر، مگر اسٹیج 1 اور 2 کی پابندیاں برقرار۔

دہلی این سی آر میں فضائی آلودگی میں معمولی بہتری کے بعد بدھ کو ایئر کوالٹی کمیشن نے گریڈیڈ ریسپانس ایکشن پلان (GRAP) کے اسٹیج 3 پابندیاں واپس لے لی ہیں۔ حکام کے مطابق دارالحکومت دہلی کا ایئر کوالٹی انڈیکس (AQI) 327 ریکارڈ کیا گیا، جو ’سنگین‘ زمرے سے نکل کر ’بہت خراب‘ کی سطح پر پہنچ گیا ہے۔ اس فیصلے کے بعد دفاتر میں 50 فیصد ورک فرام ہوم کی پابندی اور اسکولوں میں ہائبرڈ کلاسز کا نظام ختم کر دیا گیا ہے۔

تاہم، اسٹیج 1 اور اسٹیج 2 کی پابندیاں بدستور نافذ رہیں گی کیونکہ فضائی آلودگی اب بھی خطرناک حد کے قریب ہے۔ اسٹیج 2 کے تحت ہوٹلوں اور کھلی دکانوں میں کوئلہ اور لکڑی کے استعمال پر پابندی، ڈیزل جنریٹرز کے استعمال پر سخت پابندیاں، سڑکوں کی مشینی صفائی اور تعمیراتی سائٹس پر سخت نگرانی جاری رہے گی۔

علاقائی سطح پر آلودگی میں بھی بڑی بہتری نہیں آئی ہے۔ نوئیڈا، گریٹر نوئیڈا اور غازی آباد میں AQI بالترتیب 348، 324 اور 334 ریکارڈ کیا گیا، جو ’بہت خراب‘ کے زمرے میں آتا ہے، جبکہ گڑگاؤں اور فرید آباد میں ہوا کا معیار ’خراب‘ درجے پر برقرار ہے۔

حکام کا کہنا ہے کہ سردیوں میں ہوا کی رفتار میں کمی، گاڑیوں کے اخراج، فصلوں کی باقیات جلائے جانے اور صنعتی آلودگی کے باعث دہلی ہر سال شدید فضائی آلودگی کا سامنا کرتی ہے۔